𝗜𝗟𝗢𝗜𝗟𝗢 – Patay ang isa ka babaye matapos gin hit and run sang driver nga nagamaneho sang Toyota Vios nga Sedan sa Barangay Kirayan Norte, Miagao, Iloilo.
Ang biktima amo si Jenery Neirves Naldoza, 40, kasado, residente sang nasambit nga lugar.
Samtang ang driver naman sang kotse amo si John Perez, residente sang Barangay Damilisan, Miagao, Iloilo.
Sa interview sang Bombo Radyo kay Police Major Richard Lao, hepe sang Miagao Municipal Police Station, iya ginpahayag nga nagasaot ang biktima sa higad sang dalan sang ginbungguan sang kotse nga naghalin sa Guimbal, Iloilo.
Suno kay Lao, madasig ang pagpadalagan sang driver sang kotse rason nga wala niya natalupangdan ang biktima nga ara sa dalan.
Nag-angkon naman ang biktima sang pilas sa ulo kag sa nagkalain-lain nga bahin sang iya lawas nga amo ang gintunaan sang iya kamatayon.
Nagpalagyo pa ang driver, apang nagsungka sa pulis matapos nga natumod ang iya identity.
Sa subong, ginahibalo pa kun magpasaka sang kaso ang pamilya sang biktima batok sa driver sang kotse.
– 𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗛𝗮𝗻𝗻𝗮 𝗝𝗼𝘆 𝗔𝗻𝗱𝗮𝘀𝗮
