𝗜𝗟𝗢𝗜𝗟𝗢 𝗖𝗜𝗧𝗬 — Dako nga pwersa para sa bahin sang Iloilo City Police Office (ICPO) ang bag-o nga mga Police Station 7, 8, 9, kag 10 sa Iloilo City.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga makabulig ang bag-o nga mga istasyon nga mapasangkad ang police presence kag visibility sa kabug-usan nga syudad.
Suno kay Sangrines, dugang ini nga pwersa agud nga mapalapit sa komunidad kag pumuluyo ang seguridad kag proteksyon nga mahatag sang kapulisan.
Gina-ekspektar man sini ang mas madasig nga pagresponde sang kapulisan sa mga emerhensya sa palibot sang syudad.
Ginpahayag man sini nga ang presensya sang pulis sa isa ka komunidad ang magabulig agud mas mangin matahap ang mga residente nga magkomiter sang krimen.
Ginalantaw man sang natungdan nga isa ka dako nga development para sa mga Ilonggo ang pagdugang sang kapulisan sa ginakabig nga fastest growing city sa pungsod.
