Naglab-ot na sa masobra P15.2 million ang nahalit ni Bagyo Kristine sa imprastruktura, samtang P9.7 million naman sa agrikultura.
Suno sa National Disaster Risk Reduction and Management Council (NDRRMC), kalabanan sang halit ang naghalin sa rehiyon sang Bicol nga nagalab-ot sa P15 million.
Sa mga casualties, ginpahayag sang NDRRMC nga 13 ang nareport nga napatay lakip na ang 11 sa Bicol kag tig-isa sa Central Luzon kag CALABARZON.
Samtang ang fatality lang sa CALABARZON ang na-validate suno sa NDRRMC kon sa diin, napatay ang biktima matapos mahulog sa kanal sa San Andres, Quezon sang Martes.
Pito man ka mga persona ang ginreport nga missing kag lima ang ginreport nga napilasan bangud kay Kristine.
Apang base sa 3 a.m. data halin sa Police Regional Office 5 (PRO-5), may yara na sang 26 ka reported fatalities sa Bicol bangud sa bagyo.
Samtang, ginpahayag naman sang NDRRMC nga 2,656,446 ka tawo ukon 569,524 ka pamilya ang apektado ni Kristine.
Kalabanan sa mga apektado nga indibidwal ang nareport sa Bicol nga may 1,860,625, ginsundan sang Bangsamoro Autonomous Region in Muslim Mindanao (BARMM) nga may 435,135 kag Central Luzon nga may 101,444.
