Siling nila, makibot ka gid sang mga bagay nga sarang mahimo sang gugma.
Amo gani nga halos daw indi makapati ang tanan sang isa ka love story sang isa ka lalaki nga na-in love sa iya nga ugangan!
Ini amo si Sikandar Yadav, 45, nga may duha ka mga kabataan, kag residente sang Bihar sa India.
Ini nga istorya ang nagsugod sa isa ka trahedya sa ila nga pamilya sang napatay ang iya nga asawa. Agud mabuligan siya sa pagtatap sa iya kabataan, nagsaylo si Sikandar sa balay sang iya mga ugangan sa Heer Moti village sa Bihar.
Sa dalayon sini nga pagtinir didto, nahulog ang iya nga buot sa iya nga 55-anyos nga ugangan nga babaye. Amat-amat nga naglapta ang tsismis nga ini, kag isa ka adlaw, nakalab-ot na ini sa ihibalo sang ugangan nga lalaki nga si Dileshwar.
Nakumpirma ini sang nagpauli si Dileshwar sa ila nga balay kag naabtan sini ang lovebirds nga nagahaksanay. Didto kag nakaakig ini kag ginpalab-ot ang reklamo sa Panchayat ukon sa ila nga barangay council agud nga masolbar.
Ginpatawag ang umagad, kag halos nakibot ang tanan bangud sa baylo nga manginwala, maisog sini nga gin-ako nga may relasyon siya sa iya ugangan nga babaye bangud nahulog ang iya buot diri. Mangin ang ugangan nga babaye ang nagsabat man nga ginahigugma sini si Sikandar.
Malawig pa nga drama ang natabo sa atubang sang council tubtub nga natabo pa gid ang isa ka imposible nga butang: NAGPASUGOT ang ugangan nga lalaki nga ihatag ang iya nga blessing kag nagbulig pa ini agud i-organisar ang kasal sang iya asawa kag umagad!
Wala na sang madamo pa nga uyang sa tyempo bangud nagtipon ang magkasilingan kag gintambungan ang kasal sang duha samtang nga saksi mismo ang una nga bana. Indi pa maathag kun magapadayon gihapon ini sa pagpuyo kaupod sa iya asawa nga subong may bag-o na nga bana sa persona sang ila umagad.
