ILOILO CITY – Ginpa-Bombo sang mga vendors ang barado nga tubo nga nagakonekta sa drainage system sa La Paz Public Market.
Sa interview sang Bombo Radyo kay Ma. Therisa Pradilla,halo-halo vendor, iya ginpahayag nga madamo sila nga mga manugbaligya ang nagareklamo sa tuman ka baho nga usbong halin sa barado nga tubo.
Suno kay Pradilla, ang ila nga tubo ang konektado man sa ila nga mga kalan-an, baligyaan sang batchoy kag mga kapehan.
Ginpahayag sini nga na sa tion nga maggamit sila sang lababo, nagabalik ang mga momho halin sa ila hulugasan.
Isa sa ginalantaw nila nga rason sang pagbara amo ang pag-ilis sang tubo sa diin halin sa apat ka pulgada, gin-ilisan ini sang duha na lang ka pulgada ang kadakuon.
Ginpahayag sini nga madamo sang mga customers nila ang nagareklamo bangud sa tuman ka baho nga usbong sa diin nagakadulaan ang mga ini sang gana nga magkaon.
Samtang, nagapanugyan naman ang presidente sang market vendors sang solusyon sa nasambit nga reklamo.
Sa interview sang Bombo Radyo kay Charlie Chan, iya ginpahayag nga nagakadapat nga ilisan sang mas dako nga tubo nga nagakonekta sa mga kalan-an kag iban pa nga baligyaan sang pagkaon kag ilimnon.
Suno kay Chan, napuno na sang sebo ang tubo nga isa sa mga rason sa pagbara sini.
Nagakadapat man suno sa natungdan nga magbutang sang ‘grease trap’ agud masala ang sebo halin sa labado.
Nagalaom man ang natungdan nga masolusyunan sang Iloilo City Government ang ila reklamo.
Nagsabat naman ang Iloilo City Engineer’s Office sa problema sang barado nga tubo nga nagakonekta sa drainage system sa La Paz Public Market.
Sa interview sang Bombo Radyo kay Joel Gerasmia, Chief of Staff sang opisina, iya ginpahayag nga indi problema sa tubo ang rason sang pagbara, sa baylo, ini ang paghaboy sang momho sa lababo.
Suno kay Gerasmia, nag-augment na ini sang mga tinawo agud mag-declog sang bara.
Nagpanugyan naman ang natungdan sa mga vendors nga likawan ang pag-haboy sang ano nga sahi sang matig-a nga pagkaon ukon solid food sa lababo agud indi ini magbara.
