Nagpatigayon sang delikado nga interception ang China Coast Guard (CCG) 21612 batuk sa BRP Cabra samtang ini ang nagapatrolya malapit sa Bajo de Masinloc subong nga Lunes, Abril 14.
Sa isa ka pahayag, ginreport ni Philippine Coast Guard (PCG) spokesperson Commodore Jay Tarriela nga madasig ang paghulag sang CCG vessel kag dayon nagmaniobra kag naglabay sa port side sang BRP Cabra rason nga delikado nga nagbalabag sa ruta sini.
Ang insidente natabo sa palibot sang 132.97 nautical miles (NM) west southwest sang Capon Grande sa Zambales ukon ginabanta 36.35 NM south sang Bajo de Masinloc.
Suno sa opisyal, ang insidente nagapakita sang paglapas sang CCG sa International Regulations for Preventing Collisions at Sea kag hayag nga indi pagsapak sa safety sa dagat.
Nagbayluhanay man sang radio challenges ang CCG vessel kag BRP Cabra.
Samtang, subong nga adlaw, Abril 15, aktibo nga nagpatrolya ang BRP Cabra sa baybayon sang Zambales sa idalom sang mando ni Lieutenant Commander Hanna Yanez, isa ka babaye nga skipper, agud punggan ang pagtinguha sang CCG nga i-normalize ang ila ilegal nga pagpatrolya sa sulod sang exclusive economic zone (EEZ) sang Pilipinas.
Sa piyak sini, bisan pa nga ang barko sang China mas daku sangsa BRP Cabra, ang kumander sang PCG nga si Admiral Ronnie Gil Gavan nag-insister nga ang internasyonal nga kasuguan nagahatag sang gahum sa aton barko nga magpadayon sa pagpatrolya nga wala sang kahadlok.
Ini nga pagsalig suno sa iya, nagahatag sang kahigayunan sa BRP Cabra nga hangkaton ang CCG, nga ginabuyagyag ang ila indi makatarunganon nga mga aksyon kag mga taktika sa pagpang-bully sa international community.
