Nagpanawagan si Senator Ronald “Bato”Dela Rosa sa Tri-Committee (TriComm) sa Kamara nga indi lamang magtutok sa Diehard Duterte Supporter (DDS) vloggers kundi imbitaran man sa hearing ang mga social media influencer nga makabig nga pro-administration.
Ang TriComm — nga ginabug-usan sang Committees on Public Order and Safety, Information and Communications Technology, kag Public Information — amo ang naga-imbestigar sa nagalalapta nga fake news kag disinformation sa social media.
Suno sa senador, kun matuod nga indi ini pagpang-ipit sa mga content creator nga kritikal sa administrasyon, dapat nga dal-on man sa imbestigasyon ang mga nagapabor sa Marcos administration.
“Kasi kung interesado talaga sila na bibigyan ng solusyon ‘yung sinasabi nilang fake news or what kung ano talaga ‘yung objective ng kanilang investigation, kung ito’y hindi panggigipit sa mga vloggers na kritikal to the administration ay dapat imbitahan nila lahat-lahat pati na ‘yung mga vloggers na favoring the administration,” pahayag sini.
Gin-kwestyon man sini kun “in aid of legislation” gid man ang hearings ukon ginagamit lamang agud nga i-“single out” ang pro-Duterte vloggers.
“Lahat dapat fair. Hindi lang DDS. They don’t have to single out the DDS vloggers. Lahat dapat eh imbitahan nila para magkaalaman kung talagang ito’y in aid of legislation,” dugang sini.
Naghingyo man ini sa TriComm nga dapat wala sang pamulitika sa inquiry.
Matandaan nga sang Martes, may gin-isyu na nga subpoena sa social media personalities nga wala nagsipot sa hearing bisan nga ginpadal-an na una sang show cause orders.
Lakip diri sanday anay press secretary Trixie Cruz-Angeles, Krizette Laureta Chu, Sass Rogando Sasot, Mark Anthony Lopez, Lorraine Marie Badoy-Partosa, Jeffrey Almendras Celiz (Eric Celiz), Dr. Richard Mata, Ethel Pineda Garcia, Joie De Vivre (Elizabeth Joi Cruz), Aaron Peña kag Mary Jean Reyes.
Ang nagduso sa tikang nga idagdag ang subpoena amo si Abang Lingkod Party-list Rep. Joseph Stephen Paduano, samtang ang nag-affirm sang motion amo si Antipolo Rep. Romeo Acop nga chairman sang Tri Comm hearing.
Gin-subpoena man pati ang Facebook Philippines kag ang ByteDance Philippines nga amo ang local arm sang kumpaniya nga nagapanag-iya sang TikTok.
