Nagaplano si Senador Ronald “Bato” Dela Rosa nga maglunsar sang parallel investigation sa ginahimo man sang Kamara nga pagpangusisa sa drug smuggling sa Pilipinas kun sa diin nabulgar ang pangalan sang anak kag umagad ni anay Presidente Rodrigo Duterte.
Sa joint hearing sang Kamara sang nagligad nga adlaw, matandaan nga ginpapungko bilang resource person ang anay intelligence officer sang Bureau of Customs nga si Jimmy Guban kun sa diin gin-tag sini sa smuggling sang iligal nga droga sanday Davao City Rep. Paolo “Polong” Duterte, bana ni Vice President Sara Duterte nga si Manases Carpio, kag anay presidential economic adviser Michael Yang.
Partikular nga gin-istoryahan sa amo nga hearing ang shipment sang shabu nga nagabalor sang P11-billion nga nakumpiskar sa Manila Port sang 2018.
Suno naman kay Dela Rosa, naga-preparar siya sang resolution nga nagapanawagan sang imbestigasyon bangud nagapati siya nga indi mapatihan kag indi lohikal ang mga alegasyon ni Guban batok kay Pulong kag bayaw sini nga si Mans.
Ginsiling ni Dela Rosa nga ginagamit sang mga kontra sang Duterte si Guban agud nga gub-on ang pamilya sang former president.
Kun indi ma-block ukon ma-hijack ang iya resolution suno kay Dela Rosa, subong nga semana i-file ang measure agud nga mausisa ang mga ginpanghambal sang anay Customs officer.
“If I don’t get blocked, if my resolution doesn’t get hijacked, I will file a resolution next week to investigate what a convicted Customs officer is saying,” pahayag sini.
Sang ginpa-klaro sa iya kun ano ang buot silingon sang “hijack”, ginsiling sini nga nagakatabo ini kun gin-refer ang resolution sa lain nga mga komite nga indi man mag-usisa sang matarong.
Sa statement naman ni VP Sara, ginsiling sini nga indi siya makasabat sa isyu para sa iya utod kag bana apang base sa personal sini nga panan-awan, isa ka political harassment ang nagakatabo.
“Lahat ito ay political harassment, political attacks. Nakikita niyo naman, lumabas siya nung umalis ako sa DepEd (Department of Education), lumabas siya nung nagsasalita na ako kung anong dapat pinagawa natin para sa ating bayan,” pahayag sini.#
