Ginkumpirma sang Criminal Investigation and Detection Group (CIDG) nga diri pa sa Pilipinas si Senator Ronald “Bato” dela Rosa.
Suno kay CIDG director Maj. Gen. Robert Alexander Morico II, classified ini nga impormasyon, apang ginpilit ini sang pamangkot nga may mga alegasyon nga nagguwa na sa pungsod si Dela Rosa paagi sa “backdoor” exit.
Nagapatuhoy ang “backdoor” exit sa indi awtorisado nga exit point nga masami yara sa southern area sang pungsod.
Diri na kag nagsabat si Morico nga diri pa sa Pilipinas si Bato kag iga-serbe nila ang arrest warrant.
Ginmandu kahapon sang Department of Justice (DOJ) sa Philippine National Police (PNP) kag sa National Bureau of Investigation (NBI) nga arestuhon si Dela Rosa bangud sang standing arrest warrant sang International Criminal Court (ICC) sa kaso nga crimes against humanity bangud sa papel sini sa drug war.
Gin-deny man sang Supreme Court ang iya pangabay nga magpaguwa sang Temporary Restraining Order (TRO) batok sa implementasyon sang arrest warrant.
Naglahog naman si NBI Director Atty. Melvin Matibag kun buhok bala ang buot silingon sang may nagpamangkot nga reporter kun butangan bala si Dela Rosa sang “patong sa ulo” kasunod sang pag-tag sa iya sang DOJ bilang fugitive from justice.
Suno kay Matibag, indi mandato sang NBI ang pagpain sang reward money para sa mga tawo nga ginapangita sang awtoridad. Apang dugang sini, may yara na sila sang team para nga tutukan ang pagpangita kay Dela Rosa.
Una na nagpahayag si Matibag nga kasunod sang mandu sa ila sang ila lead agency nga DOJ, dakpon nila si Dela Rosa nga wala sang delay, wala sang kahadlok, kag bisan gusto man sini ukon indi.#
 nga diri pa sa Pilipinas si Senator Ronald “Bato” dela Rosa.){kind=link}