ILOILO CITY – Nagpabutyag sang “commitment” ang Bureau of Fire Protection sang ila mangin partisipasyon sa Dugong Bombo 2019 sa Nobyembre 16.
Sa interview sang Bombo Radyo kay Fire Superintendent Crosbee Gumowang, Assistant Regional Director for Administration, iya ginpahayag nga magapadala sila sang Fire personnels sa amo nga bloodletting project bilang suporta sa Bombo Radyo.
Suno kay Gumowang, indi pa subong matumod kon pila sa ila mga opisyal ang magakadto, apang magahatag sila sang travel order ilabi na sa mga tinawo nila nga wala man makadonate sang dugo sa ila katapusan nga bloodletting project sang Oktubre 28.
Ini bangud suno sa iya, may ara sang kaugalingon nga programa sa dugo ang Bureau of Fire Protection, kag masami ini nga ginahimo sang makatatlo ka beses sa isa ka tuig.
Ginpahanumdom man ni Gumowang sa mga opisyal nga antes magdonar sang dugo, magpahuway gid sang maayo kag likawan ang pag-inom sang makahulubog nga ilimnon.
Nahibaluan nga ang Dugong Bombo ang pagahiwaton sa Sabado, Nobyembre 16, sa Iloilo Science and Technological University sa Burgos,La Paz, Iloilo.
