Ginklaro sang local government unit sang Jordan, Guimaras nga sa Abril 7 pa mangin epektibo ang saka sa pletehay sa fiber vessels nga nagabyahe sa Jordan pa-Iloilo City and vice versa.
Sa interview sang Bombo Radyo kay Mayor John Edward Gando, iya ginpahayag nga sandig sa ila na-istoryahan sang Guimaras Island Transport Multipurpose Cooperative (GITMPC), kinahanglan pa nila i-comply ang 14 ka adlaw nga posting requirement nga ginapatuman sang gobyerno.
Buot silingon sini, kinahanglan anay nila ipahibalo sa mga pasahero sa sulod sang duha ka semana nga may saka sa pletehay antes ini i-implementar epektibo sa Abril 7.
Gin-athag man ni Gando nga temporaryo lamang ang fare hike samtang nga may krisis pa kag nagatimbuok ang presyo sang produktong-petrolyo.
Pananglitan magbalik na sa normal ang sitwasyon suno sa alcalde, hikuton man ang adjustments agud nga mapabalik sa normal ang pletehay sang mga commuter.
Sa updated fare matrix, yari ang rates nga isukot sa mga pasahero:
- Regular Daytime: P40 (Cash) / P36 (Card)
- Discounted Daytime (Student/PWD/Senior): P32
- Nighttime (8 PM onwards): P50 (Cash) / P45 (Card)
- Discounted Nighttime (Student/PWD/Senior): P40
Matandaan nga sang Marso 24 sang gin-anunsyo sang Guimaras Provincial Government ang fare increase. Ginpalab-ot sa mga pumuluyo nga nakasugtan ang adjustment matapos ang mahinalungon nga konsiderasyon kag malawig nga diskusyon sa stakeholders agud nga mabalanse ang operational needs sang transport sector kag ang ikaayo sang commuting public.
Antes ang pagsapubliko sang agreement, may yara man sang consultative meeting ang probinsya nga ginpatigayon.#
