Naghimo sang rekord ang girl group nga BINI bilang top artist sa Spotify kag ginlapawan pa si Taylor Swift bilang most-listened-to singer sa Pilipinas.
Hunyo 14 sang nalab-ot ini sang BINI suno sa Spotify Charts. Suno sa record label sini nga Star Music Philippines, ini man ang una nga tion nga may Filipino act nga nakatupa sa #1 spot sa Spotify Philippines Daily Top Artists Chart.
Una nga nakasulod sa charts, partikular sa number 190, ang BINI sang Pebrero 9, 2024. Sulod sila sa ranking sa sulod sang 128 ka adlaw antes nalab-ot ang pinakamataas nga spot.
Antes sini, si Taylor amo ang nagapangibabaw nga daily artist sa Spotify Philippines sa sulod sang 968 days. Sang 2022, ang Quezon City ang nalakip pa gani sa top listeners sang amo nga American superstar sa bilog nga kalibutan.
Ang ikatatlo nga spot sa local chart ang gina-okupa ni Hev Abi kag ginasundan nanday Ariana Grande, Sabrina Carpenter, Maki, TJ Monterde, SZA, Al James, kag Billie Eilish.
Ang BINI naman ang may masobra 6.5 million monthly listeners sa Spotify samtang ang ila hit song nga Pantropiko ang nakatipon sang masobra 80 million plays (as of writing.)
Ang grupo — nga ginabug-usan nanday Jhoanna, Maloi, Stacey, Aiah, Colet, Gwen, Mikha, kag Sheena — ang nagselebrar sang ila ikatatlo nga anibsersaryo sang nagligad lamang nga Hunyo 11. Kilala sila nga “Nation’s Girl Group” kag popular man sa mga kanta nga “Na Na Na,” “Lagi,” “Huwag Muna Tayong Umuwi,” kag “Salamin, Salamin”.
