Nagbalik si US Secretary of State Antony Blinken sa Middle East agud nga matutukan ang diskusyon sa ginaduso nga ceasefire proposal sang Estados Unidos sang Amerika sa Israel-Hamas war.
Nakapakigkita na ini kay Egyptian President Abdel Fattah el-Sisi sa Cairo kun sa diin ginsulit sini ang panawagan sa Palestinian group nga Hamas nga batunon ang truce proposal ni President Joe Biden nga ginplastar sang nagligad pa nga Mayo.
Ginbasol man sini ang Hamas nga amo ang nagapalawig sang gyera bangud wala sini ginabaton ang proposal.
Kaundan sini nga proposal amo ang anum ka semana nga untat sa gyera kag pagpaguwa sang mga Israeli hostages sa Gaza kag Palestinian prisoners sa Israel kag paghatag ligwa sa negosasyon para sa permanent ceasefire.
Bisan gina-insister sang US officials nga ginabaton sang Israel ang proposal, may Israeli officials lakip mismo si Prime Minister Benjamin Netanyahu nga nagsiling nga padayunon nila ang away tubtub nga dalayon nga mapulbos ang militante nga grupo.
Nagpakigkita man si Blinken kag Netanyahu kag naka-schedule man sa dugang nga diskusyon sa Qatar kag Jordan subong nga semana.
Sini gid lamang nga kaagahon (oras sa Pilipinas) sang gin-aprubahan sang United Nations Security Council ini nga proposal sang US. 14 ka myembro ang nagboto-pabor samtang nag-abstain naman ang Russia.
