ILOILO CITY – Indi na mahimo nga makasulod sa Syudad kag Probinsya sang Iloilo ang mga residente sang Bacolod City, Negros Occidental kag Negros Oriental.
Sa exclusive interview sang Bombo Radyo kay Iloilo City Mayor Jerry Trenas, iya ginpahayag nga bangud sa padayon nga pagtaas sang kaso sang Coronavirus disease 2019 (COVID-19) sa nasambit nga mga lugar, siraduhon ang borders agud indi ang mga ini makasulod sa syudad.
Suno kay Treñas, epektibo ang pagpasirado sang border sa bwas, Hunyo 22, 2020.
Gin-athag naman sang alkalde nga amg mga essential goods, kag cargoes ang magapadayon sa gihapon.
Ginpahayag ni Treñas nga ang nasambit nga desisyon ang ginkasugtan sang COVID-19 task force nga ginabug-usan sang mga doktor sang Syudad sang Iloilo.
Natawgan naman ni Treñas ang mga pinuno sang tagsa ka local government unit kag ginpabalo sa nasambit nga desisyon.
Siraduhon ang tanan nga mga pantalan sa Estancia kag Dumangas, Iloilo para sa mga residente sang Bacolod City, Negros Occidental kag Negros Oriental.
Sa interview sang Bombo Radyo kay Iloilo Governor Arthur Defensor Jr., iya ginpahayag nga ang nasambit nga tikang ang may katuyuan nga indi malatnan sang COVID-19 ang mga pumuluyo sang Probinsya sang Iloilo.
Gin-athag man ni Defensor, nga may pahanugot sang Inter Agency Task Force ang nasambit nga desisyon.
Nakigsapol naman si Defensor sa mga transport industries sa pagkansela sang pagpasulod sang mga residente sa nasambit nga mga lugar.
