Ginpakigbahin ni Ombudsman Jesus Crispin “Boying” Remulla nga na-diagnose siya nga may leukemia matapos nagpaidalom sa quintuple bypass heart surgery sang 2023.
Sang amo nga tion, secretary si Remulla sang Department of Justice (DOJ).
“In 2023, I was diagnosed with a heart condition that required bypass surgery. I had surgery, I had a quintuple bypass, and when I was recovering, I was diagnosed with cancer — leukemia, a cancer of the blood,” panugiron sang Ombudsman.
Ginahimo ang quintuple bypass agud ma-treat ang blocked arteries nga naga-suplay sang dugo sa korason, samtang ang leukemia amo ang kondisyon kun sa diin may abnormal nga kataason sang numero sang white blood cells ang isa ka tawo.
Suno sa iya, ang mga sintomas nga iya nabatyagan sang una amo ang pagkahilo, pagpalangluya, kag pagdugo sang ilong.
“Laging nagno-nose bleed, tapos ayaw tumigil,” pahayag sang Ombudsman. Apang dugang niya, wala niya ginpanumdom ang kamatayon bisan sang amo nga kondisyon. “I refuse to think of it that way. Kasi ang tingin ko lang, tomorrow is another day. Get through the night. Mapalipas mo lang ang gabi, paggising mo sa umaga, isang araw na naman na ibinigay sa ‘yo. Just natural, I just live by the day.”
Suno pa sa opisyal, naka-recover siya sa sini nga blood cancer matapos nga nagpaidalom siya sa duha ka cycles sang chemotherapy, total body radiation, kag bone marrow transplant sa St. Luke’s Medical Center sa Bonifacio Global City (BGC) agud nga maka-produce sang healthy blood cells.
Pahayag sini, ang iya anak amo ang donor sang bone marrow sang ginpatigayon ang transplant: “My blood now is not my old blood. It is blood from my son. We are a full match, that’s how I recovered and the prognosis looks good.”
Ini ang una nga tion nga ginkumpirma ni Remulla nga na-diagnose siya nga may leukemia.
Matandaan nga sang DOJ Secretary siya sang 2023, nag-avail ini sang 10-day wellness leave bangud sa “personal reasons” kag sang ulihi gin-anunsyo sini nga nagpaidalom siya sa bypass surgery.
Pormal nga nagpungko si Remulla bilang Ombudsman sang Oktubre 9 sang nagpanumpa siya sa atubang ni Acting Chief Justice Marvic Leonen sa Supreme Court sa Manila.#
