Nakarekord sang dos puntos kag tatlo ka blocks ang anak ni basketball superstar LeBron James nga si Bronny sa preseason debut sini sa Los Angeles Lakers nga amo man ang imbukada nga hampang sang team antes ang regular season sang National Basketball Association (NBA).
16 minutos ang ginlawig ni Bronny sa court kun sa diin wala nakasulod ang nauna nga lima ka tira, apang nakahimo man ang 6-foot-2 guard sang isa ka rebound kag isa ka assist sa first half sang second quarter kag sa ikaapat nga frame.
124-107 ang resulta sang hampang pabor sa Minnesota Timberwolves.
Wala pa gihapon nasaksihan sang fans ang historic father-son duo nga nagahampang sa isa lang ka NBA team bangud nagpungko lang si LeBron, wala naka-uniporme, kag wala nakaupod sa mga naghampang.
Nahibaluan nga napilian si Bronny sa second round sang NBA Draft kag nakahampang ini sa summer league sa Las Vegas. Ginalantaw nga magahampang ini sa Lakers sa preseason apang sa regular season, posible nga magatupa ini sa South Bay Lakers sa G League.
Magluwas nga wala si LeBron sa una nga preseason game, wala man si Anthony Davis sa hampang sang Lakers, apang patas lang para sa fans bangud ginbangko man sang Wolves ang ila 2024 All-Stars nga amo ang shooting guard nga si Anthony Edwards kag power forward nga si Julius Randle.
Buwas, 9:30 sa aga (oras sa Pilipinas), magahampang liwat ang Lakers batok sa Phoenix Suns kun sa diin ginalauman nga makaupod na ang 39-anyos nga league topscorer nga dungan naman sa ika-20 nga kaadlawan ni Bronny.#
