Ginlimitahan sang Bangko Sentral ng Pilipinas (BSP) ang balor sang payouts ukon withdrawals sa kada transaksyon kada adlaw.
Suno sa central bank, mahimo lamang makakuha sang P500,000 sa kada transaksyon ilabi na subong nga padayon ang imbestigasyon sa ginaalegar nga mga anomaliya sa flood control projects.
Sa Circular No. 1218, series of 2025 nga ginpaguwa ni BSP Governor Eli Remolona Jr., ginmanduan ang central bank-supervised financial institutions (BSFI) nga mag-implementar sang “enhanced due diligence” sa dalagku nga value cash-related payments kag transactions.
Pahayag sang bangko, ang withdrawals nga nagalapaw sa gin-set nga balor ang mahimo lamang himuon ukon ma-facilitate paagi sa check payment, fund transfer, direct credit to deposit accounts, kag iban pa nga paagi paagi sa digital payment platform sang BSFI.
Ginmanduan man ang bangko kag iban pa nga supervised financial institutions nga i-konsiderar ang alerts, red flags, kag makaduluda nga mga indikasyon kaangay sang typologies nga gin-report sang government agencies nga naga-involve sang large or unusual cash transactions sa pag-file sang suspicious transaction reports.
Ini nga direktiba ang natabo kasunod sang anunsyo sang Anti-Money Laundering Council nga gin-freeze sang Court of Appeals ang 135 bank accounts kag 27 insurance policies nga naangot sa mga persona nga involved sa iregularidad sa flood control projects.
