Ginkilala ni Atty. Ruel Von Superio, Iloilo Provincial Population Officer, ang dako nga papel sang kapin 2,500 ka Barangay Service Point Officers (BSPOs) sa pagpalapit sang serbisyo sang gobyerno sa mga pumuluyo, kadungan sang 2026 Provincial BSPO Congress nga ginhiwat subong nga adlaw, Nobyembre 16, sa Iloilo Convention Center.
Sa iya mensahe, ginpahayag ni Superio nga ang mga BSPO indi lamang mga boluntaryo kundi mga frontliner sang community service kag importante nga partner sang gobyerno kag sang mga komunidad.
Suno sa iya, labaw pa sa pagtipon sang data ang ila papel bangud sila ang nakahibalo sang pulso, kinahanglanon kag sitwasyon sang tagsa ka komunidad.
Ginkilala man niya ang kontribusyon sang mga BSPO sa pagpabilin sang population kag demographic data, pag-promote sang Responsible Parenthood and Family Development, pagpalapnag sang ihibalo tuhoy sa adolescent health and youth development, kag pagsuporta sa mga programa para sa kaayuhan sang pamilya kag kabataan.
Gin-athag man ni Superio nga ang matuod nga pag-uswag sang Iloilo wal lang nagabase sa kadamuon sang mga proyekto, programa ukon awards nga nabaton sang probinsya, kundi sa kadamuon sang kabuhi nga natandog, pamilya nga napabakod kag komunidad nga napauswag.
Samtang, isa sa mga gin-highlight sa BSPO Congress amo ang pagkilala sa mga maayo nga inisyatibo sang mga local government units pinaagi sa 2026 Search for Best Practices and Innovations in the Population and Development Program kag 2026 Search for the Best-Managed Population Data Bank.
Ginpabugal man ni Superio ang inisyatibo nga “Data Naton, Istorya Naton” nga nakasulod bilang isa sa Top Three National Finalists sa 2026 Rafael M. Salas Kaunlarang Pantao Awards sa kategorya nga Most Outstanding CSO in the Search for Transformative POVDEV Strategies.
Suno sa iya, ang pagkilala isa ka kadalag-an indi lamang sang Federation of Iloilo Provincial Service Point Officers, Inc. (FIPSPO), kundi sang tanan nga BSPOs nga nangin kabahin sang inisyatibo.








