Posible nga magpatuman sang mas hugot nga protocols ang Iloilo City Government sa mga bars kag night establishments sa siyudad kasunod sang duha ka separado nga insidente sang kinagamo sa isa ka resto bar sa Gaisano ICC Grounds, Barangay San Rafael, Mandurriao.
Bangud sini, nagresulta sa pagkadalahig sang siyam ka indibidwal, lakip ang menor-de-edad nga lalaki.
Suno kay Iloilo City Mayor Raisa Treñas, ginpahayag sini nga nag-coordinate na ang city government kay Iloilo City Police Office (ICPO) Director Police Colonel Wilbert Parilla agud ipa-imbestigaran ang natabo kag masiguro nga mapabilin ang kalinong kag seguridad sa siyudad.
Suno kay Treñas, ginapaabot nga magpatigayon sang dialogue ang kapulisan subong nga adlaw, Nobyembre 16, upod sa management sang establishment kag sa mga persona nga nadalahig agud ma-review ang safety protocols nga ginapatuman sini.
Apang, gin-athag ni Treñas nga ginahulat pa niya ang rekomendasyon ni Parilla antes magdesisyon kung ano nga dugang nga tikang ukon mas hugot nga regulasyon ang mahimo ipatuman sa mga night establishments.
Sa pihak sini, nanawagan si Treñas sa mga tag-iya sang bars kag iban pa nga establishments nga unahon ang safety sang ila mga customer kag publiko, kag gamiton ang ila discretion sa pagdumili sang dugang nga pagserbisyo sang ilimnon sa mga customer nga sobra na ang kahubog.
Dugang pa ni Treñas, indi lamang ang mga customer ang madalahig sa masami nga pagkinagamo sa isa ka establishment kundi pati ang negosyo bangud mahimo madula ang pagsalig sang publiko sa seguridad sang amo nga lugar.
Padayon man ang monitoring ni Task Force on Moral and Values Formation Head Nestor Canong sa mga bars kag night establishments sa siyudad.
Madumduman nga pasado alas-2:30 sang kaagahon sang Nobyembre 15, 2026, apat ka indibidwal ang gin-aresto sang mga bouncer sa G-Park Resto Bar matapos ginreport nga nagsinggit, naghangkat sang inaway kag nangguba sang LED light fixture nga nagabalor sang P30,000.
Lakip sa apat ang isa ka 17-anyos nga menor-de-edad nga lalaki nga gin-refer sa Women and Children Protection Desk.
Samtang, pasado alas-4:00 sang kaagahon, lima pa ka indibidwal ang nadakpan sang Iloilo City Police Station (ICPS) 10 matapos ang isa pa ka insidente sang kinagamo sa comfort room sang amo man nga establishment, kung sa diin ginreport nga gin-gamit sang isa ka involved ang bangko sa pagpanglampos rason nga naguba ang duha ka bangko.
Sa karon, ginapreparar na sang ICPS-10 ang pagpasaka sang nagakaigo nga kaso, lakip ang Alarms and Scandals kag Malicious Mischief, depende sa resulta sang imbestigasyon.













