Indi lang isa, indi lang duha, kundi tatlo ka gid bag-o nga Guinness World Records titles ang ginauyatan subong sang K-pop superstars nga BTS.
Gin-anunsyo sang Guinness World Records nga gin-break sang BTS ang numero sang pinakadamo nga followers sa Instagram, Twitter kag TikTok. Suno sa Guinness, yara sa 60,151,959 ang followers sang BTS sa Instagram sang nagligad nga bulan; most followed music group man ini sa TikTok nga may 45.7 million followers; kag may 44,167,059 followers sa Twitter.
Bangud sini nga bag-o nga achievements, nagdangat na sa 28 ka titulo halin sa GWS ang ginauyatan sang grupo.
Sang Septyembre 2021, ang BTS ang ginpasindunggan sa Guinness World Records 2022 Hall of Fame.Sa subong, gina-enjoy anay nila ang ila nga “extended break” samtang naga-preparar sa ila nga “Permission to Dance on Stage” world tour. ##
