Ginpanawagan ni Congressman Ferdinand Hernandez, budget sponsor sang Department of Energy (DOE), nga suportahan sang ahensya ang pagbukas liwat sang option para sa suspension sang fuel excise tax.
Sa idalom sang Tax Reform for Acceleration and Inclusion (TRAIN) Law, may provisyon nga nagapahanugot sa gobyerno nga i-suspend ang excise tax sa petrolyo kun maglab-ot sa $80 kada barrel ang presyo sang Dubai crude oil.
Apang nag-expire na ang nasambit nga provision.
Sa ginpatigayon nga plenary deliberations para sa 2026 proposed budget sang DOE, ginpamangkot ni Gabriela Party-list Representative Sarah Elago kun may tikang bala nga pagahimuon ang DOE matapos ginpahayag ni Hernandez nga kinahanglan anay sang bag-o nga layi antes makahimo sang suspension ang executive branch.
Ginpahayag pa gid ni Elago nga indi lamang sila nagaduso sang temporaryo nga suspension sang excise taxes sa oil kag petroleum products, kundi ang permanente nga pagbawi ukon pagbasura sini.
