Nagalibog ang ulo ni Cabatuan, Iloilo Vice Mayor Ronilo Caspe kun ngaa siya gid ang ginalagas sang isa ka residente nga naga-claim nga tag-iya ini sang duta kun sa diin ginapatuman ang quarry sa Tigum River, Brgy. Salacay sa amo nga banwa.
Sa interview sang Bombo Radyo kay Caspe, iya ginpahayag nga natingala siya kun ngaa ginadumtan siya ni Maria Fe Cabucos nga amo ang naga-claim nga siya ang tag-iya sang duta, apisar nga sang 2023 nga ulihi nga nag-renew sang permit ang banwa, bise-alkalde na ini kag wala siya nagapangamot sa pagproseso sang permit.
Suno kay Caspe, mas maayo kun sa nagakaigo nga opisina ukon sa Provincial Environment and Natural Resources Office magpasaka sang reklamo si Cabucos bangud nga ini ang naga-supervise kag nagahatag sang permit para sa amo nga quarry operation.
Sa pagkamatuod suno kay Caspe, ang gina-claim ni Cabucos nga iya duta ang wala man nakapangalan sa iya kundi kay Francisco Zaragoza.
Dugang sang bise-alkalde, indi man pribado nga propiedad ang area nga ginakuhaan sang balas kag bato bangud sakop ini sang river course.
Ginkwestiyon naman ni Caspe nga kun sapakon niya si Cabucos kag batuan, pat-ud nga indi man makasarang ang amo nga complainant.
Ginatugyan nalang sang opisyal sa publiko ang pagbinag-binag bangud kilala man nila kun ano nga klase sang tawo si Cabucos.
Nagpangabay man ini kay Cabucos nga kun guba ang iya pangabuhi, indi dapat ini mangdalahig sang iban nga tawo.
