Papauli na kuntani sa banwa sang Oton si Fire Inspector Roberto Tamayo sang naagyan sini nga may sunog sa Zone 1, Barangay Old Airport, Mandurriao, Iloilo City.
Kaupod sini ang iya asawa nga isa man ka bombero. Sa baylo nga magpahuway sa iya off-duty, ginpakamaayo sini nga magpanaog sa salakyan kag magbulig sa iban man nga firefighters.
“By heart, bisan indi akon area of responsibility, nagbulig na lang ko sa akon fellow firefighters,” suno kay Tamayo sa interview sang Bombo Radyo. “Papuli na kami sang misis ko nga firewoman man ‘galing nakita ko nga may kalayo nga daku. Ginbilin ko na lang ang amon nga salakyan. May PPE man ako nga dala sa akon nga salakyan, te nagbulig na lang ko diri. Responsibilidad ko ni bilang bombero.”
Si Tamayo ang nagapungko subong bilang hepe sang Zarraga Fire Station. Antes sini, siya ang deputy provincial fire director.
Lakip siya sa mga bombero nga maisog nga nagbulig agud matapna ang sunog nga naglamon sang mga balay sa amo nga lugar.
Sa latest report sang Iloilo City Disaster Risk Reduction and Management Office (CDRRMO), nakasaad nga 57 ka balay ang totally damaged kag 9 naman ang partially damaged.
Ginpahayag man nga 107 ka mga pamilya ang apektado. Samtang, sa inisyal naman nga rekord sang Bureau of Fire Protection (BFP), 25 ka puluy-an ang totally damaged kag anum naman ang partially damaged.
Ini nga mga datos ang gina-finalize pa sang otoridad tubtub subong. ##
