Panibag-o nga responsibilidad ang tungdan sang two-time Olympic gold medalist nga si Carlos Edriel “Caloy” Yulo matapos ini pormal na nga nagsulod sa Philippine Navy (PN) Reserve Force.
Suno sa Navy, si Naval Reserve Command head Maj. Gen. Joseph Ferrous Cuison nga nag-representar kay Navy chief Vice Admiral Toribio Adaci Jr. ang nagpanguna sa seremonya sang pagsumpa ni Yulo sa Navy headquarters sa Naval Station Jose Andrada, Roxas Boulevard, Manila, Oktubre 1.
Ginhatagan ang 23-anyos nga Pinoy gymnast sang rank nga Petty Officer 1st Class (PO1).
Pahayag ni Yulo, isa ka dungog para sa iya nga masuksok ang uniporme sang Navy kag isa man ka pribilehiyo nga ma-enlist sa Philippine Navy Reserve Force.
“I am proud to have the privilege of being enlisted in the Philippine Navy Reserve Force, a recognition I never expected in my lifetime. Wearing this Navy uniform fills me with immense pride. With all my heart, I thank the PN for this prestigious recognition. I will uphold its core values and inspire today’s youth, showing them that through sports, they too can serve our country,” pahayag sini.
Ang induction kay Yulo ang kasunod sang padayon man nga pagpasangkad sang Pilipinas sa military capabilities sini kag ginapasulod man ang prominente nga mga indibidwal sa national service.
Bilang isa ka reservist, ginalauman nga magpasakop si Yulo sa training exercises kag mahimo ipatawag agud magbulig kun may yara sang national emergency.#
