25,000 ka mga tumuluo, ginalauman nga magalantaw sa ‘Pagtaltal sa Balaan Bukid’

Ginalauman nga magalab-ot sa 25,000 ka mga tumuluo kag dumuluong ang magakadto para sa ika-48 ka tuig sang “Pagtaltal sa Balaan Bukid” sa probinsya sang Guimaras subong nga Byernes Santo, Abril 3.

Isa ini ka bantog nga Lenten tradition sa Western Visayas nga nagapakita sang pag-antos ni Hesus kag paglansang sa Iya sa Krus.

Sa interview sang Bombo Radyo kay Jordan Mayor John Edward Gando, iya ginpahayag nga ginpreparahan sang maayo ang security plan sang banwa amo man ang paghatag sang medical services pananglitan may maglain ang pamatyag.

Maga-umpisa ini sa atubang sang munisipyo 11:00 sa aga kag magatakop alas tres sa hapon sa Balaan Bukid Shrine sa Barangay Balcon Melliza.

Sa kinaandan sa nagligad nga mga tuig, naga-umpisa ang prusisyon sa Smallest Plaza sa Barangay Poblaci n apang subong, maga-umpisa ini sa atubang sang munisipyo kag mas malapit sang gamay ang ruta subong nga tuig.

May gamay man nga kinalain sa production apang amo man gihapon ang scenes nga iga-reenact kadungan sang presentasyon.

Sang 2025, nakadangat sa 24,000 ka mga indibidwal ang nagbisita sa Balaan Bukid.

Bantog sa bilog nga Western Visayas ang Pagtaltal sa Balaan Bukid nga nagsugod sadtong 1975.

Magluwas nga isa ini ka religious performance, nagaserbe man ang Pagtaltal bilang sahi sang penitensya para sa mga tumuluo nga nagakadto agud nga magpabutyag sang ila nga paghinulsol sang ila mga sala.#

(2025 File Photo)