ILOILO CITY- Ginmultahan sang Philippine Basketball Association ang Magnolia forward nga si Calvin Abueva sang P100,000 bangud sa paghikay sa physical disability ni San Miguel head coach Jorge Gallent sa Game 2 sang 2023-24 PBA Commissioner’s Cup Finals.
Gin-anunso sang liga ini nga development isa ka adlaw antes ang Game 3 nga patigayunon naman subong nga adlaw sa Araneta Coliseum.
Suno sa Philippine Basketball Association, yara sa rules sang liga nga ang sin-o man nga mag-insulto sang dignidad sang isa ka tawo kaangot sa iya ‘physical disability’ ang dapat multahan sang indi magnubo sa P 100,000.
Gin-athag naman sang liga nga ginbaton ni Gallent ang pagpangayo sang pasaylo ni Abueva matapos ini nag-reach out sa San Miguel mentor.
Wala naman sang ginpapanaog nga suspensions sa 6-foot-2 forward, nga una na nangatubang sadto sang suspension nga naglawig sang 16 ka bulan bangud sa komprontasyon nga nag-involve kay TNT import Terrence Jones kag sa anay nobya ni Bobby Ray Parks Jr.
Suno naman kay Commissioner Willie Marcial, nahitso na nanday Abueva kag asawa ni San Miguel Beermen forward Mo Tautuaa ang natabo nga tensyon matapos nagpangayo man sang pasaylo si Abueva kay Tautuaa kag sa iya asawa.
Ginpaandaman naman ini nga dagdagan siya sang mas dako nga multa nga masulit pa ang kaangay nga insidente.
