Ginpili sang mga Cardinal ang Mayo 7 nga amo ang petsa sang pag-umpisa sang Conclave kun sa diin iga-eleher ang bag-o nga lider para sa 1.4-billion nga mga Katoliko sa bilog nga kalibutan.
Suno sa Vatican, nakasugtan ang petsa sang Lunes kadungan sang una nga daily congregation sang mga cardinal kasunod sang lubong ni Pope Francis.
Ang mga cardinal lamang nga wala pa naka-80 anyos ang sarang nga makaboto sa papal election.
May 135 ka cardinals subong nga eligible nga magpasakop sa eleksyon, apang may isa nga nagpahayag nga indi ini makakadto sa Vatican bangud sa problema sa ikaayong lawas.
Suno anay Vatican spokesman Matteo Bruni, napili man sang College of Cardinals sanday Cardinal Reinhard Marx, Cardinal Luis Antonio Tagle kag Cardinal Dominique Mamberti nga buligan si Cardinal Kevin Farrell ukon ang“camerlengo” (or chamberlain).
Si Farrell ang may katungdanan nga mag-oversee kag magpanguna sa temporal goods kag rights sa Apostolic See kasunod sang kamatayon sang 88-anyos nga Santo Papa.
Sa nagligad nga duha ka conclaves nga ginpatigayon agud ma-elect sanday Pope Benedict XVI kag Pope Francis sang 2005 kag 2013, duha ka adlaw ang ginlawig sang eleksyon, apang may impormasyon nga posible mas maglawig ini subong nga tuig bangud may mga cardinal nga gin-appoint si Pope Francis nga indi pa pamilyar sa isa kag isa.
Sa Pilipinas, tatlo ka cardinals ang elegible sa pag-elect sa bag-o nga Pope.
Ini amo sanday Tagle nga Prefect of the Dicastery for Evangelization, Manila Archbishop Jose Cardinal Advincula kag Kalookan Bishop Pablo Virgilio Cardinal David.
Indi naman pwede nga maka-upod sa eleksyon sanday Manila Archbishop Emeritus Gaudencio Cardinal Rosales kag Cotabato Archbishop Emeritus Orlando Cardinal Quevedo bangud masobra na sa 80-anyos ang ila nga edad. Mahimo lamang sila makaupod sa preparatory General Congregations sang College of Cardinals.
(Photo: Mario Tomassetti/Vatican Media/Reuters)
