Magluwas sa amo, natukiban nga makapasar man ang cartoon kag anime characters kun magpa-rehistro sa subscriber identity module (SIM)cards.
Kahapon, gin-imbitar sang Presidential Anti-Organized Crime Commission (PAOCC) ang Information Technology (IT) expert nga si Mike Santos bilang resource person kun sa diin iya gin-demonstrar kun paano naga-rehistro ang scammers sang SIM Cards gamit ang identity sang cartoon kag anime characters.
Sa ginpatigayon nga actual test, na-rehistro ni Santos ang Globe nga SIM nga wala gani nakalab-ot sa tres minutos sang iya gingamit ang identity sang cartoon character nga si “Bart Simpson” halin sa animated comedy nga “The Simpsons”.
Sa test naman gamit ang Smart SIM, gingamit ang pangalan kag nawong sang “One Piece” anime character nga si “Monkey D. Luffy” kag pareho man ang resulta.
Suno kay PAOCC Undersecretary Gilbert Cruz, ini ang rason sang paglapta sang pre-registered SIM cards nga masami ginagamit sang independent contractors ukon ang iban nga naangot sa Philippine Offshore Gaming Operators (POGO).
Agud malikawan ang rehistrasyon gamit ang peke nga pangalan, isa sa suhestyon ni Cruz amo ang manual verification paagi sa pag-scan sang identification cards ukon sa pictures ukon selfies sang applicants.
Gin-suhestyon man ang paggamit sang advanced artificial intelligence (AI) technology sa pagsala sang mga ID para marehistro ang SIM.
Nagapati naman si Department of Information and Communications Technology (DICT) Sec. Ivan Uy nga makabulig sa ahensya ang confidential funds para matapna ang problema sa mga scammer bangud kun wala ang amo nga pondo, daw nakagapos ang ila nga kamot kag wala sang kapasidad nga mapapas ang amo nga krimen.
Yara sa P300 million ang confidential funds nga ginhingyo sang ahensya sa idalom sang proposed 2024 national budget. #
