AUSTRALIA – Nakahibalo ka bala kun ano ang sekreto sang tuman ka namit kag saboroso nga karne sang baka kasubong sang Wagyu beef? Pakauna sila, este ang mga baka, sang chocolate.
Huo! chocolate ang rason sang saboroso nga karne sang baka sang Mayura Station farm sa Southern Australia nga sa sulod na sang 10 ka tuig, nagpadayon ang ila negosyo bangud sa nasambit nga sekreto.
Suno kay Scott de Bruin, managing partner sang Mayura Station, nagbalik siya sa Limestone Coast sa Australia agud subli-on ang negosyo nga ginbilin sang iya amay.
Si de Bruin ang nakapaminsar nga maghimo sang espesyal ukon tuman gid ka espesyal nga meat preparation.
Nagkonsulta si de Bruin sa isa ka cattle nutritionist sa Japan kag natun-an ang espesyal nga pagpatambok kag kun paano mapahumok ang karne sang baka.
Sa iya paino-ino, kun sweets lamang ang pagahambalan, nga-a abi indi paghatagan sang chocolates ang baka? kag the rest is history.
Si de Buin ang isa na karon sa mga madinalag-on nga cattle raisers sa Southern Australia.
