Wala ginpalampas ni Senate Minority Leader Alan Peter Cayetano ang mga nagatawag sa ila nga pro-China ukon mga Tsinador.
Partikular sini nga namunuhan ang pahayag sang political analyst kag anay Cabinet Secretary nga si Ronald Llamas batok sa mga ginapahayag “pro-China” nga senador nga wala nagpirma sa resolusyon sang Senado nga nagakundena sa mga pahayag sang Chinese Embassy.
Sabat naman ni Cayetano, palareho lang nga nagapanindugan ang mga senador nga iya sang mga Pilipino ang West Philippine Sea, apang kun wala sila nagpirma, wala man ini nagakahulugan nga nagadampig na sila sa Beijing.
“Pareho stand natin. Atin to, eh. Yung approach natin ang iba… Pareho nating mahal ang Pilipinas,” suno kay Cayetano.
Nahibaluan nga sa column ni Llamas, ginpahayag sini nga ginatawag sang mga Pilipino nga “Tsinador” ang siyam ka mga senador nga nagpamalibad sa pagpirma sa resolusyon nga ginpirmahan sang 15 sa ila kaupdanan.
Ini nga resolusyon nagapanawagan sa Department of Foreign Affairs (DFA) nga maghimo sang mabakod nga diplomatic action batok sa Chinese embassy sa Manila. Nagakondena man ini nga resolution sa mga pagpang-atake sang embahada sa government officials lakip na sa mga senador kag kongresista nga nagadepensa lamang sa posisyon sang Pilipinas sa West Philippine Sea.
Kahapon, Pebrero 9, dalayon nga napasar sa upper chamber ang amo nga resolusyon.#
