Gin-anunsyo sang Vatican nga iga-install bilang cardinal sang Catholic Church si Bishop Pablo Virgilio David sang Caloocan nga amo man ang presidente sang Catholic Bishops’ Conference of the Philippines (CBCP).
Si David ang kabahin sang 21 ka bag-o nga cardinals nga pormal nga igadesignar sa amo nga posisyon sa isa ka seremonya nga pangunahan ni Pope Francis sa Disyembre 8, 2024 ukon antes ang pagbukas sang Jubilee Year of 2025.
Pagkatapos sang seremonya nga ginatawag nga “consistory”, pormal na nga kilalahon si David bilang ika-10 nga Pilipino nga nagsaka sa amo nga posisyon sa Simbahang Katolika.
Base sa Church hierarchy, ang cardinal amo ang nagapangaduha nga rank sa Santo Papa kag amo man ang nagaserbe bilang iya pinakamalapit nga advisers.
Ang ila nga historical power kag impluwensya ang nagakahulugan nga matawag gihapon sila nga “princes of the Church” apisar una naman nagpahanumdom si Pope Francis nga dapat wala sang royalty sang Simbahan kag dapat nga magpabilin nga suod sa mga pigado.
Nahibaluan nga si Bishop David ang na-eleher bilang CBCP president sang 2021 kag na-re-elect sang 2023.
Kilala siya nga vocal critic sang madinuguon nga war on drugs sang Duterte administration amo man sa red tagging.
Na-ordenahan siya bilang pari sa Archdiocese of San Fernando sang 1983, na-appoint bilang auxiliary archbishop sang amo man nga archdiocese sang 2006, kag ginsaylo sa Caloocan diocese sang 2015.
Si Bishop David ukon “Ambo” ang naeleher man bilang masunod nga vice president sang Federation of Asian Bishops’ Conferences (FABC) sang February 2024 kag opisyal nga magapungko sa amo nga posisyon sa Enero 2024.
Sa subong, lakip sa aktibo nga Filipino cardinals amo sanday Cardinal Jose Advincula sang Manila kag si Cardinal Luis Antonio Tagle nga nagaserbe naman sa Vatican kag masami naga-upod sa mga byahe ni Pope Francis.
