CDRRMO-Iloilo City, ginapaalerto ang mga pumuluyo sa 72 ka mga flood-prone barangays

ILOILO CITY- Nag-abiso ang Iloilo City Disaster Risk Reduction and Management Office sa mga pumuluyo sang syudad kaangot sa ginalauman nga mabaskog nga pag-ulan nga dala sang habagat.

Sa interview sang Bombo Radyo kay Mr. Darwin Papa, head sang Quick Response Division sang Iloilo City Disaster Risk Reduction and Management Office, iya ginpahayag nga 72 ka mga barangays ang highly prone sa baha.

Suno kay Papa, sa sini nga numero, 5 ka barangay ang may pinakamataas nga risgo sang pagbaha bangud yara ini sa kilid sang suba nga ginalakipan sang San Isidro, Tabuc Suba, Dungon A, Dungon B, Calubihan sa Jaro.

Gindugang ni Papa nga 22 man ka coastal barangay ang prone sa storm surge ukon daluyong gani ginaabisuhan ang mga pumuluyo sa sini nga mga lugar nga mag-aligmat.