ILOILO CITY – Gin-athag sang pinuno sang City Disaster Risk Reduction and Management Office (CDRRMO) nga wala ginapilit ang tagsa ka Barangay Council nga magbakal sang mga water tanks.
Ini ang may kaangtanan sa pagdeklarar sang State of Calamity sa syudad sang Iloilo bangud sa kakulang sang supply sang tubig.
Sa interview sang Bombo Radyo kay Donna Magno, pinuno sang CDRRMO, iya ginpahayag nga ang water tankers ang ginahimo nila nga rason agud nga ma-engganyo ang mga punong barangay nga makaangkon sang kaugalingon nga water tanks.
Suno pa kay Magno, mas makapaayo kun gamiton sang tagsa ka Barangay Council ang pondo sang barangay agud nga makabakal sang kaugalingon nga water tanker kag indi na magsalig pa sa bulig sang Iloilo City Government.
Mas maayo man suno kay Magno nga makapatigayon sang pagsinapol ang CDRRMO sa mga punong barangay agud nga mapatpat ang nagakadapat nga himuon agud nga masolbar ang kakulang sang tubig.
