Indi lang si Chelsea Manalo ang balantayan sang Filipino pageant fans sa Miss Universe 2024 sa Mexico sa Nobyembre kundi pati ang duha pa ka beauty queens nga nakasumpong man sini diri sa Pilipinas.
Ini amo sanday Filipina-Kiwi pageant veteran Victoria Velasquez Vincent nga magatiglawas sa New Zealand kag ang Filipina-British nga si Christina Dela Cruz Chalk nga magatiglawas naman sa Great Britain.
Si VVV nga representative anay sang Bacoor City sa MUPH 2024 ang nagpangibabaw sa 15 ka iban pa nga mga kandidata nga nag-compete kagab-i (Manila time).
Una na sini gin-athag nga nagpasakop ini sa amo nga beauty pageant sa New Zealand agud padunggan ang heritage sang iya amay.
Sang 2021, madumduman nga una na ini nag-intra sa Pilipinas kag ginhingadlan nga MUPH Charity. Sang amo man nga tuig, gintanyagan na siya sang New Zealand sang titulo apang nagbalibad ini.
Subong nga tuig naman, nagbalik siya liwat sa MUPH stage kag nagtapos sa Top 10 samtang nagkadto naman kay Manalo sang Bulacan ang korona.
Sa pihak nga bahin, si Chalk naman nga representative sang Filipino community sa UK sang nagpasakop siya sa MUPH, amo ang nagpangibabaw sa 42 ka iban pa nga finalists sang nag-compete siya sa Britanya sang Hulyo.
31 anyos na subong ang iya edad kag “dream come true” para sa iya nga makatapak sa global stage.
“Many know this wasn’t my first, second, or even third attempt at Miss Universe Great Britain,” pahayag sini. “However, when Miss Universe lifted their age restrictions, I knew there was unfinished business. I’m glad I followed my heart.”#
