ILOILO CITY– Hugot nga ginapamatukan sang Commission on Human Rights ang plano ni Presidente Rodrigo Duterte nga pagduso sa pagbuhi sang silot nga death penalty sa mga durugista kag plunderers.
Sa interview sang Bombo Radyo Iloilo kay Atty. Jonnie Dabuco, Regional Director sang Commission on Human Rights- 6, iya ginpahayag nga antes ipatuman ang death penalty, kinahanglan nga kay-uhon anay ang judicial system sang pungsod.
Suno kay Atty. Dabuco, sa estado sang judicial system subong, pat-ud nga madamo sang inosente nga mga akusado ang mapatay nga wala sang sala bangud wala sila sang ikasarang nga magkuha sang lagting nga abugado agud magpangapin sa ila.
Ginpahayag man ni Dabuco nga kun madayon gid man ang death penalty sa Pilipinas, kuntani mapatuman ini sang insakto.
Samtang, ginpahayag sang Regional Director nga pananglitan ipatuman ang death penalty, may malain nga epekto ini sa imahe kag kredibilidad sang Pilipinas.
Suno kay Atty. Dabuco, signatory ang Pilipinas sa International Covenant on Civil and Political Rights nga nagapamatok sa death penalty kag obligasyon sang pungsod nga tumanon ini.
May kaangtanan naman sa paggwa sang Pilipinas sa United Nations Human Rights Council (UNHRC) agud makalikaw sa imbestigasyon tuhoy sa paglapas sa tawhanon nga kinamatarung sang Anti-Drug Campaign sang Duterte Administration, ginpahayag ni Dabuco nga nagapakita lang ini nga may ginatago ang administrasyon kag indi manami nga ehemplo para sa iban nga pungsod.
