Nagpanawagan ang Commission on Human Rights (CHR) Region 6 sa mga otoridad nga pangdakpon kag pasabton gid ang mga suspek sa likod sang makahalunusbo nga pagpatay sa biktima amo si Jonalyn Sucaldito, residente sang Barangay Nabitasan, Pototan, Iloilo.
Sa interview sang Bombo Radyo kay Atty. Jonnie Dabuco, director sang Commission on Human Rights Region VI, iya ginpahayag nga kuntani indi lang mahulog sa imbestigasyon ang ini nga kaso kag mahatagan sang sabat ang hustisya nga ginasinggitan sang pamilya.
Nagpanawagan man ini sa gobyerno nga indi magpiyong sa nagakatabo sa realidad kag hatagan sang hustisya ang mga tawo nga brutal nga ginpatay kasubong sa biktima nga si Sucaldito.
Dugang pa sang natungdan, mahimo man nga magpatigayon sang kaugalingon nga imbestigasyon ang CHR apang sa subong suno sa iya, ila ginabilin ang otoridad sa katapo sang Philippine National Police (PNP).
