Pagtilaw. Pagbaton. Pagtuo.
Diri nasentro ang nangin dalagan sang kabuhi sang isa ka Chronic Kidney Disease patient.
Ini amo si Lara Taclima, 25-anyos, pumuluyo sang Tubungan, lloilo, kag graduate sang Iloilo Science and Technology University.
Sa interview sang Bombo Radyo kay Taclima, iya ginpahayag nga sa iya pagdumdom, mangin tayuyon na ang iya paglab-ot sa handom nga mangin isa ka architect matapos siya naggradwar sa kolehiyo apang nagbag-o ini sang na-diagnose siya nga nagasuprir sang nasambit nga balatian.
Suno kay Taclima, sang nahibaluan niya ang iya balatian nga stage 5 Chronic Kidney Disease, halos indi ini makapati apang madasig niya nga ginbaton ini kag gin-atubang ang realidad sang iya sakit.
Sa baylo nga mangin masako kuntani para sa iya preparasyon agud magkuha sang Architect Licensure Examination, nagkadto ang iya tiempo sa pagpabulong, partikular na ang pagpaidalom sa dialysis, duha ka beses kada semana.
Suno sa iya, sa pihak sang sini nga pagtilaw, nagapangibabaw ang iya paglaum nga malampuwasan niya ini paagi sa suporta kag pagpalangga sang iya pamilya kag ang iya hugot nga pagtuo sa Diyos.
Sa subong, may yara na sang kidney donor si Taclima kag nagapangamuyo siya nga mangin successful ini kun patigayunon na gid man ang operasyon.
Nahibaluan nga ang Chronic Kidney Disease (CKD) ang nagaapekto sa kapin 12.9 million Filipinos, ukon 11.2% sang populasyon.
