Nagpaathag si Iloilo City Mayor Jerry Treñas nga indi direkta nga makadto sa mga job hire sang city government ang gintanyag nga bugas sang National Food Authority (NFA).
Sa interview sang Bombo Radyo kay Joy Fantilaga, spokesperson ni Mayor Treñas, iya ginpahayag nga nagpadala sang sulat ang nasambit nga talatapan agud nga ipahibalo nga may yara sang monthly allocation sang 7,500 ka bags sang bugas nga for sale.
Suno kay Fantilaga, pangitaan pa sang pondo agud nga mabakal sang city government ang bugas kag mabaligya sa kapareho man nga balor nga ginhatag sang NFA.
Ginpahayag man sini nga ginalantaw sang syudad ang volume sang bugas nga baklon bangud may mga specific pa ini nga alokasyon.
Plano naman nga i-endorse sang alkalde ang tikang sa finance committee agud matumod kon may pondo nga gamiton sa pagbakal.
