Gin-apinan ni Optimum Star Claudine Barretto si Mariel Rodriguez-Padilla nga todo-depensa sa kuwalipikasyon sang iya bana nga si Senator Robinhood Padilla.
Ini kasunod sang pag-ulan sang kritisismo kay Mariel matapos nabukaran sang netizens ang isa ka video clip sa vlog sini sang 2022.
Sa amo nga video, gin-isa-isa ni Mariel ang mga kwalipikasyon ni Robin nga kandidato pa lamang sadto sa pagka-senador. Suno sa anay aktres, bisan yara pa lang si Robin sa New Bilibid Prison, nakapasar na ini sang layi, gani para sa iya, sobra pa sa kwalipikado ang iya bana nga mangin senador.
“Si Robin nakapagtapos yan ng college. Meron siyang degree criminology. Si Robin, nung nasa bilibid siya, nakapagpasa na ng batas without even being Senator,” kabahin sang iya vlog.
Gin-share naman ni Claudine ang isa ka comic strip parte sa isyu kag simple lamang nga nagsulat sang caption nga, “True.”
Bangud sa nagkalain-lain nga reaksyon sa social media, nagpagwa si Mariel sang panibag-o nga video statement agud klaruhon ang iya una nga mga ginpahayag.
Suno sa iya, sang nagsiling siya nga naga-obra na sang layi si Robin samtang yara pa sa Bilibid, ang iya buot silingon amo ang tion nga nagpakigbahin ang iya bana sa mga diskusyon kaangot sa igaduso nga mga hagna.
Ginmensyonar man ni Mariel ang Republic Act 8294 nga ginpatuman sang 1997 kag may kaangtanan sa illegal possession of firearms nga kaangot sa nangin kaso ni Robin.
“When Robin was in Bilibid, his case became closely associated with the issue that RA 8294 addressed—illegal possession of firearms. RA 8294 was enacted in 1997 while he was incarcerated,” paathag sang aktres.
Ang nangin problema suno kay Mariel amo nga ginhatagan sang iban sang literal nga kahulugan ang iya una nga pahayag.
“Now, IF gamitin natin ang talino na binigay sa atin ng Maykapal… sino kaya ang nag-draft at nagpasa ng bill na naging RA 8294? Obviously, legislators.”
Pagkatapos nga nagpagwa si Mariel sang iya clarification, gin-share ini liwat ni Claudine, kag nag-caption sang “Love [you] & Utol Mariel Termulo-Padilla.”
Nauna naman nga gindepensahan ni Robin ang iya asawa kag nagsaway sa netizens.
“Mahiya naman kayo! Baka kayo mismo ay binabaha na ngayon, pero ang isyu ninyo ay tungkol pa rin sa vlog ni Mariel noong 2022 at sa misis ni Sen. Bato,” suno sa actor-turned-politician.
Dugang sini: “Nagbubulag-bulagan at nagbibingi-bingihan sa baha, daig ninyo pa ang mga p*ta kung magpagamit sa ambisyoso.”#
