ILOILO CITY – All set na ang stage para sa presidential debate sang Commission on Elections (Comelec) sa isa ka hotel sa Pasay City.
Kagab-i, nagpatigayon sang inspection sanday Comelec Chairman Saidamen Pangarungan, Commissioner George Garcia kag spokersperson James Jimenez sa venue sang presidential debate.
Siyam sa 10 ka mga presidential candidates ang nag-komiter nga matambong sang debate kasunod sang pagpamalibad ni Former Senator Ferdinand “Bongbong” Marcos Jr. bangud makigkita ini sa iya mga supporters.
Ang debate nga may titulo nga “PiliPinas Debates 2022: The Turning Point ang magasugod las-7 sa gab-i kag ginabanta magatapos las-9 sa gab-i.
Suno kay Comelec spokesman James Jimenez, ang pinaka una nga debate ang maga sentro sa pandemic kag ekonomiya sang pungsod.
Ang mga organizers ang magabunot sang 20 ka mga pamangkot nga nagikan sa mga netizens apang ginklaro ni Jimenez nga indi tanan nga 20 ka mga pamangkot ang maggwa.
Hatagan ang mga kandidato sang isa kag tunga nga minutos para sa primary response; 30 seconds sa rebuttal kg 30 seconds sa rejoinder.
Ginklaro sang Comelec nga indi mahimo nga makadala sang kodigo ang mga kandidato sa ibabaw sang stage apang, may yara sang ibutang nga note pads kag ballpen sa podium.
Suno naman kay Comelec commissioner George Garcia, importante nga magpamati sang debate ang mga Pilipino bangud paagi sini, mas makilala ang mga kandidato kag kung ano ang ila plataporma kag plano sa pungsod.
Bantayan diri sa Bombo Radyo Iloilo ang pinakaulihi nga mga updates angut sa presidential debates.
