Nagahuray-ad kag naipit sa tunga sang kahoy kag kawayan ang isa ka 51-anyos nga construction worker matapos madisgrasya sa iya ginamaneho nga motorsiklo sa Brgy. Gemat-y, Passi City, Iloilo.
Sa interview sang Bombo Radyo kay Fire Officer 1 Jeric John Casamayor, Chief of Emergency Medical Services sang Passi City Bureau of Fire Protection, iya ginpahayag nga naabtan nila ang biktima nga wala na sang pulso kag lipong ini.
Suno kay FO1 Casamayor, naghalin ang biktima sa iya trabaho kag pauli na kuntani sa iya pamilya sang natabo ang insidente.
Dugang pa niya nga posible nga madasig ang pagpadalagan sang biktima sang iya motorsiklo kag nadulaan ini sang kontrol sa manibela.
Bangod sini, nagbunggo ang iya motorsiklo sa kahoy sa kilid sang karsada kag tungod sa impact, nagtabog kag naipit ang iya lawas sa tunga sang kahoy kag kawayan.
Nag-agum ang biktima sang patal nga pilas sa ulo kag nakaangkon man ini sang samad sa mata.
Gindala pa ang biktima sa ospital apang gindeklarar ini nga dead on arrival.
Text: Bombo Krylle Melliza
Photo courtesy:Passi City BFP/ FB Page
