ILOILO – Ginaplastar na sang Iloilo Provincial Government ang contingency plans sa tion nga mag-umpisa na ang El Niño sa pungsod.
Sa interview sang Bombo Radyo kay Iloilo Governor Arthur Defensor, Jr., iya ginpahayag nga ang sektor sang agrikultura amo ang tuman nga maapektuhan bangud sa mainit nga panahon.
Suno kay Defensor, ang focus sang probinsya amo ang pagpa-improve sang mga water systems nga ginalakipan sang irrigation canals kag small-scale irrigation projects agud nga mangin available kag accessible sa mga mangunguma.
I-activate man sang gobernador ang Provincial Civil Defense agud nga ma-monitor ang sitwasyon sang mga kabanwahan sa probinsya kag mabuhinan ang epekto sang phenomenon sa agrikultura.
Una na nga naghatag sang direktiba si Department of the Interior and Local Government Secretary Benjamin Abalos sa tanan nga local chief executives nga preparahan ang El Niño agud nga ma hagan-hagan ang impact sini.
Sa idalom sang administrasyon ni President Ferdinand Marcos Jr., magapahamtang sang madamo nga water-related infrastructure ang gobyerno kaangay sang hydroelectric power plants, flood control projects kag irrigation systems.
