ILOILO CITY- Ginkwestiyon ni Iloilo City Councilor Romel Duron ang pagpatarasak nga pagpautang sa mga Board of Directors sang Iloilo City Government Employees Multi-Purpose Cooperative.
Sa privilege speech ni Duron sa regular session sang Iloilo City Council, ginkatingala sini kun ngaa nga ginpahanugutan ang multiple loans kun sa diin may yara sang myembro sang Board nga 20 gid ang loans nga nagalab-ot sa kabilugan nga P7.8 million kag may yara pa gani sang 79 gid ka loans sa isa lang ka tawo nga nagalab-ot tanan sa masobra P4 million.
Suno kay Duron, ang iban diri nga loan ang humalin sang 2016 kag halos wala pa nagabayad.
Sa amo man nga privilege speech, gin-special mention ni Duron si Councilor Alan Zaldivar nga may yara man sang loan sa kooperatiba.
Samtang, emosyonal naman nga ginpaathag ni Iloilo City Councilor Alan Zaldivar sa konseho kun sa diin nagkadto ang gin-loan sini sa kooperatiba.
Base sa record,may yara sang kapin P1.2 million nga loan si Councilor Zaldivar.
Suno sa iya, gin-gamit niya ang kwarta para sa balaydan sa hospital sang iya amay kag wala niya ini ginkawat.
Pahayag niya, wala niya gin-abuso ang kooperatiba sa iya nga loan bangud nag-agi ini sa insakto nga proseso kag bilang myembro sang kooperatiba, gin-gamit lang niya ang amo nga prebilihiyo.
Sa pagkamatuod suno sa iya, ginakabig siya nga “member in good status” may kaangtanan sa iya loan kag ginabuhinan man ang iya sweldo sang ₱40,000 kada bulan.
