Gin-abisuhan sang Department of Agriculture (DA) ang local farmers kag fisherfolk nga magsugod na sa pag-harvest bilang preparasyon sa halit ni Tropical Depression Kristine nga ginalauman nga makadangat sa typhoon level sa Huwebes sang gab-i.
Sa advisory sang ahensya, ginpanawagan sini sa mga mangunguma kag mga manugpangisda nga anihon na ang gulang na nga crops, gamiton ang post-harvest equipment kag facilities, kag sayluhon ang farm machinery, equipment, kag iban pa nga gamit sa uma sa mas mataas nga lugar.
Ginpahanumdom man sa mga mangunguma nga i-secure na ang mga reserba nga binhi, planting materials, kag iban pa nga farm inputs sa safe nga storage areas. Dapat man nga siguruhon nga mahawan ang mga kanal sa irrigation kag rice paddies, kag dapat nga bastante man ang feeds kag tubig para sa mga hinuptanan nga iga-relocate.
Nahibaluan nga masobra 15 ka areas ang napaidalom na sa Storm Signal Number 1 bangud sa malain nga tiyempo.
Ginalantaw nga mahimo si Kristine nga tropical storm sa masunod nga 12 ka oras kag makalab-ot sa lebel nga severe tropical storm sa Miyerkules antes ang typhoon category sa Huwebes sang gab-i ukon sa Biyernes sang aga. Ginalantaw man nga maga-landfall ini sa northeastern portion sang Cagayan.
Todo naman subong ang preparasyon sang national kag local government units sa northern Luzon pati na sa Batan kag Ilocos Norte nga bag-o lang ginlaslasan sang Bagyo Julian.#
