ILOILO – Nakigsapol si Iloilo Governor Arthur Defensor Jr. kay Carles Mayor Sigfredo Betita kag mga stakeholders agud istoryahan ang problema sang mga tawo sa duta kadungan sang ginapatindog nga development project sa Sicogon, Carles, Iloilo.
Sa interview sang Bombo Radyo kay Defensor, iya ginpahayag nga iya gin-engganyo ang pagsipad-sipad sang problema kag paglantaw kon ano ang mahimo ginhalinan sini.
Ginpasalig ni Defensor ang bulig nga pwede mahimo sang national government sa mga pumuluyo lakip na ang Department of Agriculture, Department of Social Welfare and Development, kag Philippine National Police.
Iya ginpahayag nga indi lang sa Carles, Iloilo ginakinahanglan ang amo nga solusyon kundi sa bilog nga kinto distrito.
Suno kay Defensor, dapat nga gamiton nga kapital sang bug-os nga kinto distrito ang matahum nga hitsura agud madala ang madamu nga turista kag mapauswag ang ekonomiya sang lugar.
Iya gin-athag nga limitado ang isda kag manggad sa kadagatan amo nga dapat mag-umpisa na patindog sang manami nga turismo.
Samtang, nag-abot na sa lima ka qualified cooperatives sa Carles, Iloilo ang fund nga gamiton sa pagpamakal sang palay sa mga mangunguma.
Suno kay Governor Arthur Defensor Jr., ini nga mga accredited coperative ang magabakal sang bisan basa nga mga palay sa mga small farmers sa P14 kada kilo.
Ini ang mandato nga ginhatag sang Iloilo Provincial Government bilang bulig sa mga banwa nga indi malab-utan pamakal sang National Food Authority.
