Ginapreparar na ang datos kag rekisitos agud nga maka-request ang Iloilo Provincial Government sa Sangguniang Panlalawigan nga magdeklarar sang state of calamity sa probinsya sang Iloilo bangud sa nagapadayon nga krisis sa produktong-petrolyo.
Suno kay Governor Arthur Defensor, Jr., nagsapol na siya sa mga alkalde agud nga pangayuon ang ila nga bulig nga matipon ang data santo sa guidelines sang National Disaster Risk Reduction and Management Council (NDRRMC).
Sa amo nga guidelines, mahimo madeklarar ang state of calamity kun 15% sang populasyon ang apektado ukon 30% sang economic sector ukon palangabuhian ang apektado.
Suno pa sa gobernador, kun may duha ukon masobra pa nga mga banwa nga magdeklarar sang state of calamity, mahimo man ini nga mangin basehan.
Kun ma-secure na ini, diri na kag i-convene ang Provincial DRRMC antes nga mag-request sang deklarasyon halin sa provincial board.
Sa subong suno sa governor, may yara sang P82-million nga Quick Response Fund (QRF) ang probinsya apang indi ini bastante para nga ma-cover ang nagakinahanglan sang bulig.
“We discussed this with our municipalities, we need to have a declaration of a state of calamity for the province. Dira kita nagapabulig sa aton nga mga munisipyo,” suno kay Defensor.
Magluwas sa pagsapol sa mga alkalde kaina, gin-istoryahan man ang fuel supply situation sa Western Visayas kaupod ang Department of Energy-Visayas Field Office.
Ginplastar ang data sa report sang DOE nga as of March 20, 2026, makaigu pa ang gasolina sa 53 ka adlaw; makaigu ang diesel sa 45 ka adlaw; kag makaigu ang fuel oil sa 61 ka adlaw.
Gintumod naman ang nagapanguna nga mga pagpanghangkat kaangay sang pagpabaskog pa sang energy conservation and efficiency measures; pagpasiguro sang paghatag-prayoridad sa importante nga mga sektor; kag pag-address sa economic impact sang pagtimbuok sang presyo sang gatong.
