ILOILO CITY – Gin-athag sang Department of Health (DOH) Region VI sa publiko nga wala sang kaso nga nagpositibo sa novel coronavirus sa bilog nga Western Visayas.
Sa interview sang Bombo Radyo kay Dr. Mary Jane Juanico, head sang DOH6 – Infectious Disease Section, iya ginpahayag nga negatibo man ang resulta sa tatlo ka tawo sa probinsya sang Aklan nga una na nga ginkabig bilang ‘persons under investigation’ bangud nakit-an sang mga sintomas sang coronavirus.
Suno kay Juanico, sa subong, may yara sang tatlo ka tuig nga bata nga lalaki sa syudad sang Iloilo nga ginpaidalom sa close monitoring agud matsekyar ang iya ikaayong lawas matapos nagbatyag sang hilanat.
Suno pa sa natungdan, nagapadayon man ang ila maid-id nga monitoring.
Apisar wala pa ang amo nga virus sa Western Visayas, nagpanugyan ang natungdan sa publiko nga sa tion nga makabatyag sang sintomas kaangay sang ubo kag hilanat, dapat gid nga magpakonsulta sa doktor.
Dapat man nga ipabilin ang ‘healthy lifestyle’ kag ang mga ‘self protection measures.’
Gin-isa isa man ni Juanico sa publiko ang mga dapat sundon agud malikawan nga mag-abot ang problema kag ini amo ang WUHAN: W-ash your hands regularly; U-se facemask if necessary; H-ave your temperature checked regularly; A-void crowded places; kag, N-ever touch your eyes, nose and mouth with dirty hands.
