ILOILO CITY- Tinguhaan sang Department of Health nga malagas ang wala nalab-ot nga target nga porsyento sang kabataan nga nagaedad 5 anyos panubo nga ma-fully immunized sang 2021.
Sa interview sang Bombo Radyo kay Daphynie Teorima, Regional Coordinator sang National Immunization Program, iya ginpahayag nga sa target nga 95%, 64.36 lang ang fully immunized nga kabataan sa bilog nga Pilipinas.
Suno kay Teorima, isa sa mga rason amo ang COVID-19 pandemic nga nagtuga sang disruption sa routine immunization sa pungsod.
Pahayag niya, sa National Vaccination Days sa Abril tubtob Hunyo, positibo sila nga malab-ot ang target sang kabataan nga ma-fully imunized.
Ang National Immunization Program (NIP) ukon kilala man nga Expanded Programme on Immunization amo ang premiere vaccination program sang pungsod nga nagahatag sa kabataan, mga lapsag kag ila iloy, sang access sa routine vaccines nga rekomendado para sa ila edad.
Ini ginalakipan sang bakuna kontra tuberculosis,tetanus, hepatitis, pneumonia, measles kag iban pa.
