Bisan pa nga nangawat sa ila mismo nga eskwelahan, ginatanyagan gihapon sang Don Bosco Boys Home School Training Center sa Dumangas, Iloilo sang libre nga edukasyon kag vocational training ang pito ka mga suspek nga involved sa pagpangawat sang mga tools kag labor materials sa nasambit nga institusyon.
Sa interview sang Bombo Radyo kay Fr. Joel Jurao, SVD,Technical Director, iya ginpahayag nga may isa ka persona nga nakakilala sa mga suspek, nga isa man ka graduate sang amo nga training center.
Paagi sa sini nga persona, nakumbinsi ang mga suspek nga ibalik ang mga gamit nga ila ginkawat, gani gilayon man ini nga nabawi.
Suno kay Fr. Jurao, sa pihak sang ila nahimo nga ilegal nga aktibidad, bukas gihapon ang eskwelahan nga hatagan sila sang kahigayunan nga makapadayon sa pag-eskwela kag makakuha sang teknikal nga kahibalo kag abilidad.
Dugang pa, lunsay out of school youth ang mga suspek kag mas ikaayo nga matagaan sila sang oportunidad para mabag o man ang ila panggawi.
Sa karon, duha na sa pito ka mga suspek ang nagbaton sang tanyag sang eskwelahan, samtang may isa pa nga padayon nga ginakumbinsi.
Ang Don Bosco Boys Home School Training Center isa ka TESDA-accredited training institution nga nagahatag sang vocational courses pareho sang welding, automotive kag electrical.
Libre man ang training nga ginatanyag sang eskwelahan sa mga kabataan agud hatagan sila sang kahigayunan nga makatuon sang mga abilidad nga mahimo nila magamit sa pagpangita sang trabaho kag pagpauswag sang ila kabuhi.
Text by: Bombo Jay Panizales
