Magapatuman sang dredging ang Department of Public Works and Highways (DPWH) Region 6 sa Iloilo River.
Sa interview sang Bombo Radyo kay Engineer Niel Ravena, head sang Iloilo City General Services Office (GSO), iya ginpahayag nga ang tikang ang may tinutuyo nga mangin matalunsay ang ilig sang tubig sa suba.
Sa piyak sini, ginakahangaw-an sang pila ka mga stakeholders nga matandog ang viewing deck no. 4 ukon 5 sang Isla Verde.
Suno kay Ravena, parte lamang sang maintenance sang suba ang ginaduso nga tikang kag para man sa development sang Iloilo River.
Gin-athag man sini nga naga-form lamang ang magamay nga isla sa tunga sang suba kon may pagbaha kag isa lamang ka natural phenomenon.
Isa naman sa ginalantaw nga pagpanghangkat sang talatapan amo ang paglapad sang mga mangrove nga posible makapugong sa ilig sang tubig kag makapanabaw sang suba.
